Терең тарихы, бай дәстүрі және заманауи даму стратегиясы тоғысқан бұл білім ордасы еліміздің әлеуметтік-экономикалық және рухани дамуына өлшеусіз үлес қосып келеді. ҚазҰУ-тек жоғары білім беретін мекеме ғана емес, ұлт болашағын қалыптастыратын стратегиялық орталық.Университет атауы ұлы ойшыл Әбу Насыр әл-Фарабидің есімімен тығыз байланысты. Әл-Фарабидің ғылым мен ізгілікке негізделген философиясы ҚазҰУ-дың даму бағытымен үндесіп жатыр. Ғұламаның «қайырымды қоғам» идеясы бүгінгі күні білім мен ғылым арқылы кемел тұлға тәрбиелеу миссиясымен сабақтас. Университет қабырғасында тек кәсіби маман емес, кең ойлайтын, жауапкершілігі жоғары, ұлттық құндылықтарды құрметтейтін азамат қалыптасады.Оқу ордамыз білім беру үдерісінде халықаралық стандарттарға сүйенеді. Бакалавриат, магистратура және докторантура бағдарламалары еңбек нарығының заманауи талаптарына сай жаңартылып отырады. Университеттің факультеттері мен кафедралары түрлі салалар бойынша сапалы білім ұсынады: құқық, журналистика, экономика, халықаралық қатынастар, филология, жаратылыстану ғылымдары, ақпараттық технологиялар және басқа да бағыттар. Әсіресе цифрландыру, жасанды интеллект, биотехнология, экология салаларына басымдық беріліп келеді.Ғылыми-зерттеу қызметі оқу ордамыздың басты артықшылықтарының бірі. Университет жанындағы ғылыми-зерттеу институттары мен зертханаларда іргелі және қолданбалы зерттеулер жүргізіледі. Ғалымдар халықаралық жобаларға қатысып, шетелдік серіктестермен бірлескен ғылыми еңбектер жариялайды. Бұл университеттің жаһандық ғылыми кеңістіктегі беделін арттыруға ықпал етеді. Сонымен қатар жас ғалымдарды қолдау, стартап жобаларды дамыту және инновациялық экожүйені қалыптастыру бағытында жүйелі жұмыстар атқарылуда.
ҚазҰУ халықаралық рейтингтерде тұрақты түрде жоғары орындарға ие болып келеді. Университет әлемнің жетекші жоғары оқу орындарымен серіктестік орнатып, академиялық ұтқырлық бағдарламалары арқылы студенттер мен оқытушыларға шетелде білім алу және тәжірибе жинақтау мүмкіндігін ұсынады. Мұндай халықаралық байланыстар университеттің жаһандық деңгейдегі танымалдығын арттырады.Университеттің кампусы студенттік өмірдің орталығы. Заманауи оқу ғимараттары, ғылыми кітапхана, спорт кешендері, мәдени орталықтар мен жатақханалар білім алушыларға қолайлы жағдай жасайды. ҚазҰУ қалашығы білім, ғылым және шығармашылық тоғысқан ерекше академиялық орта. Мұнда студенттер тек дәріс тыңдап қана қоймай, ғылыми жобаларға қатысады, дебат клубтарына мүше болады, еріктілік қозғалысына қосылады, мәдени және спорттық іс-шараларға белсенді араласады.Әлеуметтік жауапкершілік университет қызметінің маңызды бөлігі. Оқу ордамыз қоғаммен тығыз байланыс орнатып, құқықтық ағарту, экологиялық мәдениетті қалыптастыру, тұрақты даму мақсаттарын насихаттау бағытында түрлі жобаларды жүзеге асырады. Университет студенттері мен оқытушылары қоғамдық бастамаларға белсенді қатысып, азаматтық ұстанымның үлгісін көрсетеді.Білім сапасын арттыруда профессор-оқытушылар құрамының рөлі ерекше. Университетте тәжірибелі ғалымдар, ғылым докторлары мен кандидаттары, халықаралық деңгейде танылған сарапшылар қызмет атқарады. Заманауи оқыту әдістері мен цифрлық технологияларды енгізу оқу үдерісін тиімді әрі қолжетімді етеді. Теория мен тәжірибені ұштастыру арқылы студенттер кәсіби дағдыларын жетілдіреді.ҚазҰУ түлектері еліміздің түрлі саласында табысты еңбек етіп жүр. Олар мемлекеттік басқару органдарында, құқық қорғау құрылымдарында, халықаралық ұйымдарда, бизнес және медиа саласында, ғылым мен білім жүйесінде жауапты қызметтер атқаруда.
Бүгінде ҚазҰУ еліміздің зияткерлік бренді. Ол ұлттық рухты сақтай отырып, жаһандық білім кеңістігіне еркін кіріге алған университет ретінде танылып отыр. Университеттің басты құндылығы адам капиталы. Сапалы білім, терең ғылым және жоғары мәдениет тоғысқан ортада тәрбиеленген жас буын елдің тұрақты дамуына берік негіз қалайды.Қорытындылай келе, Әл-Фараби атындағы Қазақ ұлттық университеті – ұлттық білім мен ғылымның флагманы. ҚазҰУ – білім арқылы биікке жетелейтін, ғылым арқылы өркениетке бастайтын, ұлттық құндылықтарды дәріптейтін бірегей білім ордасы.
Атаханова Г.М
әл-Фараби атындағы ҚазҰУ-дың заң факультеті қылмыстық құқық, қылмыстық іс жүргізу және криминалистика
кафедрасының профессоры
