«Дәрігерлер, оның ішінде, иммунолог, вирусологтардың көзқарасы бойынша, иә, расында ревакцинация — үшінші компонентті салдыру қажет болуы мүмкін. Жас категориясына қарай әртүрлі кезең керек болады. Ревакцинацияның қажет не қажет емес екені ағзадағы антидене санына қарай анықталады. Сондықтан антидене саны 1-ден төмен адамдарға ревакцинация керек болуы мүмкін. Бүгінде ревакцинацияға қатысты мәселе қарастырылып, талқыланып жатыр. Алдағы таңда оның жауабын аламыз» дейді жоғары санатты инфекционист дәрігер, медицина ғылымдарының кандидаты Сәуле Атығаева.
Еске салайық, вакцинаның үшінші дозасын салу туралы мәселені Pfizer және BioNTech компаниялары көтерген болатын. Бүгінде вакцинаның үшінші дозасын салдыра бастаған ел де бар. Ол — Израиль. Елде 60 жастан асқандарға Pfizer-дің үшінші дозасы салынып жатыр. Сонымен қатар, Израильдің премьер-министрі Нафтали Беннетт елде кейінгі бес айда вакцинаның екі компонентін алғандар 1 тамыздан бастап үшінші дозаны салдыра алатынын мәлімдеді.
