Жанат Нұрпейісовтың, Ұлықбек Ачиловтың және Дәурен Әбдіхамитовтың адвокаттары олардың қорғаушыларының кінәсі сот арқылы дәлелденбегенін айтты.
«Ұрлық фактісі дәлелденбеген. Біздің қорғаушыларымызға қатысты жобалар бойынша барлық жұмыс көлемі орындалды. Сызбалар мен жобалар тапсырыс берушіге ұсынылды, олар қабылдады және ешқандай шағым болған жоқ. Ақшасын да төледі, бірақ толық емес. «Астана LRT » компаниясы қарыз болып қалды» деп жауап берді Ұлықбек Ачиловтың адвокаты Надежда Далабаева.
Дәурен Әбдіхамитовтың адвокаты Хамида Айтқалиева іс бойынша келтірілген шығын сомасының (5 миллиард теңгеден астам) LRT құрылысына ешқандай қатысы жоқ деп есептейтінін айтты.
Ол Дәурен Әбдіхамитовтың лауазымды тұлға еместігін, қандай да бір мердігер, қосалқы мердігер ұйымның басшысы, қандай да бір компанияның құрылтайшысы немесе қатысушысы болып табылмайтынын атап өтті.
«Соған қарамастан, сот оны қылмыс жасағаны үшін кінәлі деп тапты, атап айтқанда консорциумдардың шоттарына түскен ақшаны алу үшін заңды тұлғаларды іздеді. Соманың 70-80 пайызы шетелдік компаниялардың шоттарына аударылды. Ал бізді бұл ақшаны өзара бөліп алды деп айыптап отыр.
Барлық сотталушы кімге көмектескендері туралы сотқа сұрақ қойды. Бірақ, сот сотталушылардың бұл сұрағына жауап берген жоқ. Яғни, бұл соттың ол адамды анықтамағанын көрсетеді. Ұрлық жасады деген айып тағатын ешкім жоқ. Бәрі тек көмекші ғана болған» деді Хамида Айтқалиева.
