ҚазҰУ студенттерінің студенттік өмірі мазмұнға бай, серпінді әрі көпқырлы сипатымен ерекшеленеді. Мұнда әрбір жас өз болашағын айқындап, кәсіби бағыт-бағдарын нақтылап қана қоймай, өмірлік құндылықтарын қалыптастырады.Университет қабырғасындағы студенттік өмір ең алдымен сапалы білім алумен тығыз байланысты. Білім ордамызда оқу үдерісі халықаралық стандарттарға сай ұйымдастырылып, студенттердің теориялық білімін тәжірибемен ұштастыруға ерекше көңіл бөлінеді. Заманауи дәрістер, интерактивті сабақтар, ғылыми семинарлар мен пікірталастар студенттердің сыни ойлау қабілетін дамытып, өз көзқарасын еркін білдіруге үйретеді. Университеттің ғылыми әлеуеті жоғары болғандықтан, көптеген студенттер оқу барысында-ақ зерттеу жұмыстарына тартылып, ғылыми мақалалар жазуға, конференцияларға қатысуға мүмкіндік алады. Бұл олардың кәсіби деңгейінің ерте қалыптасуына және болашақ маман ретінде бәсекеге қабілетті болуына жол ашады.
Қара шаңырақ студенттерінің өмірі тек аудиториямен шектелмейді. Университетте жастардың қоғамдық белсенділігіне кең мүмкіндік берілген. Студенттер түрлі қоғамдық ұйымдар мен клубтарға бірігіп, әлеуметтік маңызы бар жобаларды жүзеге асырады. Еріктілік қозғалыстары, қайырымдылық акциялары, құқықтық ағарту шаралары мен экологиялық бастамалар студенттердің азаматтық ұстанымын нығайтып, қоғам алдындағы жауапкершілігін арттырады. Мұндай тәжірибе жастарды бейжай болмауға, өз ортасындағы мәселелерге бейімделіп қана қоймай, оларды шешуге атсалысуға үйретеді. Студенттік өмірдің маңызды бір қыры – мәдени және шығармашылық даму. ҚазҰУ-да өнер мен мәдениетке қызығушылығы бар жастар үшін мол мүмкіндік бар. Университет қабырғасында концерттер, фестивальдер, әдеби кештер, пікірсайыс турнирлері мен шығармашылық байқаулар тұрақты түрде өткізіледі. Бұл іс-шаралар студенттердің эстетикалық талғамын қалыптастырып, олардың ішкі әлеуетін ашуға көмектеседі. Әртүрлі факультеттер мен мамандықтарда оқитын жастардың бір ортада тоғысуы мәдени алмасуға, жаңа идеялардың тууына және достық қарым-қатынастың нығаюына ықпал етеді.
Оқу ордамыздың студенттерінің күнделікті өмірінде спорт пен салауатты өмір салты да маңызды орын алады. Университеттің спорттық инфрақұрылымы жастардың белсенді қозғалыста болуына, денсаулығын нығайтуына жағдай жасайды. Студенттер түрлі спорт түрлерімен айналысып, университетішілік және қалалық жарыстарға қатысады. Спорттық шаралар тек физикалық дайындықты арттырып қана қоймай, тәртіпке, төзімділікке және командамен жұмыс істеуге үйретеді. Бұл қасиеттер кейінгі кәсіби өмірде де үлкен рөл атқарады.
Студенттік өзін-өзі басқару жүйесі университет өмірінің ажырамас бөлігі болып табылады. Жастар университеттің ішкі өміріне белсене араласып, түрлі бастамаларды көтеріп, шешім қабылдау үдерістеріне қатысады. Бұл тәжірибе студенттердің ұйымдастырушылық қабілетін дамытып, көшбасшылық қасиеттерін қалыптастырады. Өз пікірін ашық айтуға, жауапкершілік алуға үйренген жастар болашақта қоғамның белсенді мүшесіне айналады. ҚазҰУ студенттері үшін студенттік өмір – бұл тек оқу кезеңі ғана емес, өзін тану, өмірлік мақсаттарды айқындау және болашаққа берік негіз қалау уақыты. Университет қабырғасында қалыптасқан достық қарым-қатынастар, ортақ естеліктер мен жинақталған тәжірибе түлектердің өмірінде ұзақ сақталады. Осындай мазмұнды әрі жан-жақты студенттік өмір қара шаңырақтың басты артықшылықтарының бірі және болашаққа сеніммен қадам басқан жастардың табысты жолының бастауы.
С.Ж.Сулейменова,
әл-Фараби атындағы ҚазҰУ-дың заң факультеті азаматтық құқық, азаматтық іс жүргізу және еңбек құқығы кафедрасының оқытушысы, заң ғылымдарының докторы,профессор
