«Елге көмек» қайырымдылық қорының басшысы Сариев пен «MM Travel» туристік компаниясының басшысы Дүйсееваға ҚР Қылмыстық кодексінің 190-бабының 3-бөлігі 4-тармағы («Ірі мөлшерде бірнеше рет жасалған алаяқтық») бойынша айып тағылған.
Өткен аптада мемлекеттік айыптаушы Ілияс Сариев пен Ақтоты Дүйсееваға 6 жыл бас бостандығынан айыру жазасын сұрады. Ал жәбірленуші тараптың адвокаттары екі айыпталушыны 7 жыл бас бостандығынан айыруды, мүліктерін тәркілеуді және белгілі бір қызметпен айналысу құқығынан айыруды өтінді.
Бүгінгі жарыссөзде сотталушы Ілияс Сариев соңғы сөзін айтты. Ол іс бойынша 26 эпизодтың 20-сына қатысы жоқ екенін атап өтті.
Сондай-ақ Ілияс Сариев істі тергеу барысында қателіктер болғанын айтты. Айтуынша, тергеуші екі бөлек істі біріктіріп жіберген.
Ілияс Сариев соттан кәмелетке толмаған 5 баласы бар екенін ескеруді сұрады.
Оның адвокаты Эльнура Кішкенебаева өз қорғауындағы азаматтың ісінде қылмыстық құрам жоқ екенін және азаматтық сипатта екенін айтты. Сонымен қатар қорғаушы 20 эпизод бойынша айыптауды алып тастауды сұрады. Ал қалған 6 эпизод бойынша жәбірленушілердің үшеуіне қаражат қайтарылып, оның екеуі кешірім бергенін атап өтті.
Жарыссөз кезінде екінші сотталушы Ақтоты Дүйсеева өз кінәсін мойындады.
Ақтоты Дүйсееваның қорғаушысы жеңілдететін мән-жайлар ретінде қылмыстың бірінші рет жасалғанын, кәмелетке толмаған баласы болуын, сот отырысында кінәсін мойындап, оған өкініш білдіруін ескеруді сұрады.
