[media=https://stopfake.kz/kk/archives/8497]
Бұл жерде «Балаларға қатысты зорлық-зомбылықты анықтау және оған медициналық қызметкерлердің әрекет етуі бойынша операциялық процедураның стандарты» жайлы айтылып отыр. ҚР Денсаулық сақтау министрлігінің хабарлауынша, оның медициналық тәжірибеге де, кісі өлтіруге де қатысы жоқ.
– Стандарт ұсынымдық сипатқа ие. Құжаттың негізгі қағидаты – баланы отбасында сақтау. Денсаулық сақтау туралы кодекске сәйкес баланы вакцинациялау тек ата – аналардың келісімімен ғана жүргізіледі, – деп хабарлады ведомстводан.
Құжаттың өзінде «медициналық тәжірибелер» деген сөздер жоқ. «Кісі өлтіру» сөзі үш рет қолданылған – физикалық зорлық-зомбылықтың белгілері туралы тарауда «Отбасындағы зорлық-зомбылықтың ең ауыр түрі – жәбірленушіні өлтіру болып табылады» деген сөйлемде.
Сондай-ақ, психологиялық зорлық-зомбылық әдістерінің сипаттамасында: «Адамды өзін-өзі өлтіруге немесе қорқыту арқылы өзін-өзі өлтіруге итермелеу» және «Өлтіру немесе денсаулыққа ауыр зиян келтіру қаупі» деген сөйлемдерде кездеседі. Бұл сипаттамалар құжатта медицина қызметкерлеріне зорлық-зомбылыққа ұшыраған балаларды уақытында тануға және оларға қол ұшын созу үшін көмек ретінде берілген.
Сондай-ақ құжатта осындай балаларға көмек көрсету принциптері көрсетілген. Олардың қатарында еріктілік, заңдылық, отбасын қолдау және сақтау, құпиялылық және т.б. бар.
Яғни, құжатта баланы ата-анасынан себепсіз тартып алып, оған тәжірибе жүргізуге және одан оны өлтіруге болатын нормалар қарастырылмаған. Мұның бәрі ойдан шығарылған және манипуляция болып табылады.
