Нәрестелердің үшеуі де ұл бала. Сәбилердің салмағы 2 келі 249, 2 келі 533, үшіншісі 2 келі 608 грамм.
Облыстық денсаулық сақтау басқармасының баспасөз қызметінен білгеніміздей, сәбилерді үйге шығару рәсімінде Атырау облыстық денсаулық сақтау басқармасының басшысы Қайсар Абдалиев пен Атырау облыстық перинаталдық орталықтың директоры Қазбек Ермағамбетов қатысты.
Үшемдердің анасы Арай– Құрманғазы ауданы, Сафон селосының тұрғыны. Бұл үшінші жүктілігі. Мұрабек пен Арай бұған дейін бір ұл, бір қыздың ата-анасы.
- Отбасымызға осындай қуаныш сыйлап жатқан келінімізге үлкен рахмет айтамыз. Бірден үш сәби әкелу ол әрине оңай емес. Үйде күтіп отырған үлкен әжесі бар. Сәбилерге Нұрислам, Нұриман, Нұрмұхамбет деп ат қойдық. Периниталдық орталығының дәрігерлеріне үлкен рахмет айтамын. Аман-есен сәбилерді босандырып, бізге табыстап жатыр. Еңбектеріне табыс тілейміз, - деді кішкентай батырлардың атасы.
Сәбилерге Денсаулық сақтау басқармасының атынан коляска сыйға тартылды.
Анықтама үшін айта кетейік, жыл басынан бері облыста үшемдердің туылуы екінші жағдай.
