Алаяқтық пен лауазымды тұлғаларға пара беруге үгіттеген Т.Садвакасов ұсталып, Қазақстанға тапсырылды. Қаржылық мониторинг агенттігі, Бас прокуратураның үйлестіруімен және Ұлттық қауіпсіздік комитетімен бірлесіп, Қазақстан Республикасының аумағына іздеуде болған Т.Садвакасов жеткізілді.
Естеріңізге салсақ, ол алаяқтық жасап лауазымды тұлғаларға аса ірі көлемде пара беруге үгіттегені үшін күдікке ілінген.
2023 жылдың шілде айында Т.Садвакасов пен адвокат С.Курманбаев өздерінің лауазымды тұлғалар арасындағы байланыстарын пайдаланып, В.Долгалев бизнес серіктестеріне қатысты алдын ала тергеу жүргізу мәселесін шешуді ұсынған.
Бұл мәселені шешу үшін Т.Садвакасов пен С.Курманбаевқа 225 миллион теңге көлемінде заңсыз сыйақы беру туралы келісім жасалған.
Алайда, ұсынылған параның бірінші бөлігін 90 миллион теңгені алған соң, олар бұл қаражатты жымқырып, өз міндеттемелерін орындамаған.
Кейіннен, Т.Садвакасов жауапкершіліктен қашып, соттан жасырынған.
Мемлекеттік шекараны заңсыз кесіп өткен соң, ол Өзбекстан Республикасының Шекара қызметі тарапынан ұсталып, оған заңсыз кіргені үшін қылмыстық іс қозғалды.
25 ақпан күні Түркістан облысындағы «Қапланбек» бақылау-өткізу пунктінде Т.Садвакасов Қаржылық мониторинг агенттігінің қызметкерлеріне тапсырылып, Шымкент қаласының тергеу изоляторына қамауға алынды.
Жақын арада ол Павлодар қаласының тергеу изоляторына жеткізіледі.
Істің ары қарай қаралуы Павлодар облысының мамандандырылған ауданаралық қылмыстық істер жөніндегі сотында жүзеге асырылады.
