Инженерлік желілер мен жылу автономды жылу энергия көздерінің дайындығы туралы өнеркәсіп және құрылыс министрі Қанат Шарлапаев баяндама жасады. Министрдің мәлімдеуінше, биыл 161 шақырым жылу желілерін жаңғыртуға республикалық бюджеттен 93 млрд теңге көзделген. Оның ішінде:
104 шақырым жылу желілерін жаңғыртуға берілетін нысаналы трансферттер есебінен 69 млрд теңге;
Үкімет резервінен 57 шақырым жылу желілерін жаңғыртуға шамамен 24 млрд теңге бөлінді.
Сондай-ақ табиғи монополиялар субъектілерінің инвестициялық бағдарламалары есебінен жалпы сомасы 17 млрд теңгеге 69 шақырым жылумен жабдықтау желілерін жаңғырту жоспарланған.
Бүгінде жергілікті атқарушы органдарға қаржыландыру жоспарына сәйкес сәуір айынан бастап 93 млрд теңгенің 72 млрд теңгесі, яғни 78% аударылды.
Бұл ретте, жылумен жабдықтаудың 64 жобасы бойынша 159 шақырымы салынды, оның ішінде:
- 54 жоба бойынша 135 шақырым салынып, жұмыстар толық көлемде аяқталды;
- 10 жоба бойынша 24 шақырым салынып, жұмыстар аяқталу сатысында.
Өңірлерде инженерлік инфрақұрылым бойынша жоспарлы жөндеу жұмыстары жүргізілуде.
Жалпы республика бойынша 541 шақырым жылу желілерін жөндеу жоспарланған. Бүгінгі күнге 536 шақырым немесе 99% жөнделді.
Шымкент қаласында жылыту маусымы 1 қарашада басталады. Бүгінге жұмыстар жалғасуда және жылыту маусымына дейін жөндеу жұмыстары аяқталады.
«Сумен жабдықтау желілерінің 1 025 шақырымы немесе жоспардың 90%-ы жөндеуден өтті, су бұру желілерінің 159 шақырымы немесе 98%-ы жөнделді. Сондай-ақ республика бойынша жылыту маусымына 12 мыңнан астам автономды қазандық дайындалды. Қазіргі уақытта көмір жоспарының 93%-ы, мазуттың 99%-ы және дизель отынының 90%-ы дайындалды. Білім беру, денсаулық сақтау және тұрғын үйлердің дайындығы 100%-ды құрайды», — деді министр.
Оның айтуынша, ағымдағы жылыту маусымындағы көмір өніміне деген қажеттілік 8,2 млн тоннаны құрайды. Жылу беру маусымы басталғалы шамамен 3 млн тонна көмір жеткізілді. Жылдық жоспардың орындалуы 37,1%-ды құрайды. 2023 жылдың сәйкес кезеңіндегі орындалуы 35,1%-ды құрады.
Бүгінгі күнге елдің көмір тұйықтарындағы түрлі маркадағы отын қоры шамамен 577 мың тоннаны құрайды, бұл өткен жылдың сәйкес кезеңімен салыстырғанда 100 мың тоннаға артық.
«Жалпы, Министрлік тарапынан өңірлерді көмірмен қамтамасыз ету мониторингі жүргізілуде. Қазақстан темір жолы мен көмір өндіруші кәсіпорындар жоспарға сәйкес көмірдің қажетті көлемін өңірлерге жеткізуге дайын. Сонымен қатар әлеуметтік көмірдің елден тыс жерлерге кетуін болдырмау мақсатында көмір экспортына лицензия беруді көздейтін Үкімет қаулысы қабылданды. Бұдан бөлек, делдалдарды болдырмау мақсатында көмірді сатуды бірте-бірте биржаға шығару бойынша жұмыстар жүргізілуде», — деді Қанат Шарлапаев.
Министр келтірген ақпаратқа сүйенсек, еліміздің солтүстік, орталық және шығыс өңірлерінде жылыту маусымы басталып, халық тарапынан көмір сатып алу белсенді түрде жүріп жатыр. Ал, оңтүстік және оңтүстік-шығыс өңірлердегі халықты көмір сатып алу бойынша ақпараттандыру жұмысын белсенді түрде жүргізу қажет.
Барлық өңірлерде жылыту маусымы кестеге сәйкес басталуда және қалған жұмыстар жылыту маусымы басталғанға дейін аяқталады.
Сондай-ақ сөз соңында Қанат Шарлапаев халықты көмірмен қамтамасыз ету бойынша атқарлып жатқан жұмыстар Министрліктің тұрақты бақылауында екенін жеткізді.
Энергетика министрлігінің мәліметінше, Қазақстан өңірлерінде жылу беру маусымы уақтылы басталды – оңтүстік облыстарда жақын күндері жылу беріледі. Бүгінгі таңда автономды қазандықтардың дайындығы 100% қамтамасыз етіліп, 19,9 мың шақырым электр желісінде, 376 қосалқы стансада, 4 046 тарату бекетінде және трансформаторларды жөндеу жұмыстары аяқталды. 535 шақырым жылу желілері жаңғыртылды, бұл жоспардың 98,5%-ы, 1 133 шақырым сумен жабдықтау және су бұру желілерін құрайды. Премьер-Министрге қыс қарсаңындағы жоспарланған барлық іс-шаралар кестеге сәйкес қатаң түрде жүргізіліп жатқаны баяндалды. Қазіргі уақытта білім беру және медициналық мекемелер, сондай-ақ еліміздегі тұрғын үй қорының 99%-дан астамы жылу беру маусымына толық дайын.
Олжас Бектенов барлық жөндеу жұмыстарының мерзімі мен нормаларын қатаң сақтаудың маңыздылығына тоқталды. Бүгінгі таңда жылу көздерінің резервтік жабдықтарын жаңғырту жалғасуда, жоспарлы жобалар іске асырылып жатыр.
«Үлкен жұмыстар атқарылды. Оны бөлінген қаржы көлемінен де, жүргізілген жұмыс ауқымынан да байқауға болады. Енді ең бастысы – жылу беру маусымын қалыпты деңгейде өткізіп, жоспарланған барлық параметрлерді сақтай білу. Коммуналдық кәсіпорындардың жөндеу бөлімшелерін қажетті құрал-жабдықтармен қамтамасыз ету керек. Олар кез келген жағдайға шұғыл әрекет ету үшін дайын болуға тиіс. Әкімдерге жылу беру маусымының барысын жеке бақылауда ұстауды тапсырамын», — деп атап өтті Олжас Бектенов.
Премьер-Министр халықты қолжетімді көмірмен қамтамасыз ету қажеттігін де баса айтты. Өңір әкімдіктері Өнеркәсіп және құрылыс, Көлік министрліктерімен бірлесіп, коммуналдық және тұрмыстық көмірді жеткізу бойынша барлық мәселелерді шешу тапсырылды. Көмірді вагондармен тасымалдауға басымдық беру қажет. Олжас Бектенов тұрғындар көмірді тұрақты бағамен сатып алуы үшін ешқандай қиындықтар болмауы керек екенін атап өтті.
Сондай-ақ Олжас Бектенов Энергетика, Ұлттық экономика министрліктері мүдделі мемлекеттік органдармен бірлесіп, жылу және электр энергетикасы бойынша «Тарифті инвестицияға айырбастау» бағдарламасы шеңберінде табиғи монополия субъектілерінің инвестициялық міндеттемелерін орындауына бақылау жасау шараларын өзектендіруді және мониторинг жүргізуді тапсырды.
