Қазақстандық жауынгердің сүйегін қарсы алуға арналған рәсім Тараз қаласы әуеайлағының әскери секторында әскери оркестрдің орындауындағы марштың сүйемелдеуімен барлық әскери рәсімдерді сақтай отырып ұйымдастырылды.
Іс-шараға Жамбыл облысының қорғаныс істері жөніндегі департаментінің, «Оңтүстік» өңірлік қолбасшылығы әскерлерінің және ардагерлер ұйымдарының өкілдері қатысты.
Жамбыл облысының тумасы Кәдірбек Дәулетқұловтың сүйегін 2023 жылдың қараша айында Ресейдің «Әулие Илья Муромец заставасы» іздеу жасағы тапқан болатын. Іздеушілер сүйектің кімге тиесілі екенін медальондағы деректер арқылы анықтай алған.
"Кәдірбек Дәулетқұлов туралы көптеген әскери ақпарат құпия. Өйткені ол Кеңес Армиясы қатарында шекарашы қызметін атқарған. Оның 1920 жылы Жамбыл облысында туғаны, 1943 жылдың жазында Курск доғасындағы қанды шайқаста қаза тапқаны белгілі", – деп атап өтті Atamnyn Amanaty қоғамдық бірлестігінің өкілі Әбубәкір Смайылов.
Қоғамдық бірлестік өкілдері анықтағандай, Кәдірбек Дәулетқұлов үйленбеген. Қаза тапқан жауынгердің Жамбыл облысында тұрған ағасының ұрпақтары табылды. Туған жері – Тұрар Рысқұлов ауданында жер қойнына тапсыру үшін сарбаздың сүйегі туыстарына тапсырылды. Сондай-ақ оның медальоны, каскасы, сапер күрегі және сарбаз кружкасы да ағайындарына берілді.
Жауынгердің сүйегін тапсыру рәсімі Жеңіс қалалық саябағында орналасқан «Даңқ» жауынгерлік даңқ залында жалғасты. Оңтүстік өңірдің әскери қызметшілері мен құрметті қарауыл ротасының сарбаздары соңғы құрмет көрсетті. Кәдірбек Дәулетқұловтың туыстары іс-шараны ұйымдастырушыларға шынайы алғысын жеткізді.
