Ұлттық экономика министрі Әлібек Қуантыров Үкімет Ұлттық банкпен бірлесіп инфляция деңгейін төмендету бойынша кешенді жүйелі шаралар қабылдап жатқанын, оның ішінде нарықты халық тұтынатын тауарлармен толықтыру әрі импортты алмастыратын жобаларды іске асыру бойынша жергілікті атқарушы органдармен бірлесіп жұмыс жүргізіліп жатқанын айтты.
"Сондай-ақ жедел сипаттағы шаралар қабылдануда. Атап айтқанда форвардтық сатып алу, форвардтық схемалар қайта форматталды. Сонымен қатар тиісті комиссия жұмыс істеуде, ол үстемеақыларды асыра алмауды қадағалап, делдалдық схемалар анықталған жағдайда тергеу жүргізумен айналысуда. Бұл жұмыс өзінің тиімділігін көрсетті. Егер бұл шаралар болмаса, инфляция айтарлықтай жоғары болар еді", - деді министр.
Министр инфляция деңгейінің 6-8% төмендеуі бойынша болжамды орындалатын міндет деп атады.
Өз кезегінде Ұлттық Банк Төрағасы Тимур Сүлейменов кейбір компоненттер бойынша тұтыну бағаларының индексі күрт өсуі мүмкін екенін растады. "Бірақ инфляция туралы айтатын болсақ, бұл экономикадағы бағаның жалпы деңгейінің көтерілуі екенін атап өткім келеді", - деді ол.
Оның айтуынша, Ұлттық статистика бюросы 508 тауар бойынша бағаның өзгеруіне баға береді, ал одан бөлек қызметтер мен жұмыстар бар. "Сондықтан, жеке тауарлар өскен кезде, ол, әрине, көзге түседі. Бағаны ұстап тұрудың негізгі құралы, әрине, базалық мөлшерлеме болып табылады. Оның маңыздылығы - бұл ақша айналымын баяулатады және бұрыннан бар ақша массасына қарсы қажетті тауарларды күтуге мүмкіндік береді. Ол халықтың да, бизнестің де жинақ мінез-құлқын ынталандырады. Яғни, бір сәтте жұмсаудың орнына халық инвестиция салады, өйткені мөлшерлеме жоғары. Инвестициялау және сол арқылы қорландыруды құру тиімді. Бұл жұмыс істейтін схема. Өздеріңіз білетіндей, бізде депозиттер рекордтық деңгейге жетті (32 трлн теңгеден астам), долларсыздандыру - 24%", - деп түсіндірді Тимур Сүлейменов.
"Сыртқы немесе ішкі соққылар болмаған жағдайда, біз 2025 жылды 5%-ға жақын аяқтаймыз деп ойлаймын. Бұл барлық ақша-несие саясатының мақсаты. Бұл жерде бізде сенімділік бар және Үкіметпен бірлескен жұмыс осыған бағытталған", - деп түйіндеді Тимур Сүлейменов.
