Лондонда сауда-экономикалық, ғылыми-техникалық және мәдени ынтымақтастық жөніндегі Қазақстан-Британ үкіметаралық комиссиясының 11-отырысы шеңберінде Қазақстан Республикасы Денсаулық сақтау министрлігі мен «AstraZeneca» халықаралық биофармацевтикалық компаниясының арасында өзара түсіністік туралы меморандумға қол қойылды. Құжат инновацияларды дамытуды, мемлекеттік бастамаларды қолдауды және Қазақстанның денсаулық сақтау жүйесін нығайтуды қоса алғанда, денсаулық сақтау саласындағы екіжақты ынтымақтастықты кеңейтуге бағытталған.
Тараптардың арасындағы ынтымақтастық жылдарында айтарлықтай нәтижелерге қол жеткізілді: өндірісті оқшаулау, заманауи диагностикалық бағдарламаларды енгізу және озық медициналық технологияларды жеткізу бойынша жобалар іске асырылуда. 2025 жылдың мамыр айында Қазақстанның аумағында компанияның бірегей препараттарының бірінші партиясының келісімшарттық өндірісін іске қосу жоспарланған.
Тараптар бұл келісім республикадағы ынтымақтастықты тереңдету және денсаулық сақтау жүйесін нығайту үшін жаңа мүмкіндіктер ашатынын, сондай-ақ Қазақстан мен Ұлыбританияның арасындағы табысты ынтымақтастықтың көрсеткіші болып табылатынын атап өтті.
Қазақстандық делегация екіжақты қатынастар тарихында алғаш рет Ұлыбританияның Кембридж қаласында орналасқан AstraZeneca компаниясының ең ірі ғылыми-зерттеу және инновациялық орталығы — Discovery Centre (DISC) орталығына барды.
Сапардың мақсаты инновациялық дәрі-дәрмектерді жасау мен әлемдік деңгейдегі клиникалық зерттеулерді іске қосуды қоса алғанда, денсаулық сақтау саласындағы ғылыми әзірлемелердің экожүйесін қалыптастыру бойынша Ұлыбританияның тәжірибесін зерделеу тәжірибесімен танысу болды.
Кездесуге DISC орталығының басшылығының өкілдері, Ұлыбритания–Қазақстан Үкіметаралық комиссиясының мүшелері, ҚР Сыртқы істер вице-министрі Әлібек Қуантыров, ҚР Денсаулық сақтау бірінші вице-министрі Тимур Сұлтанғазиев, сондай-ақ Қазақстан Республикасының Ұлыбританиядағы Төтенше және Өкілетті Елшісі Мағжан Ілиясов қатысты.
