Бейнежазба тез уақытта көп қаралым жинап, көпшілік баланың тек таңғаларлық дауысын ғана емес, уәдесінде тұра білетін қайсар мінезін де ерекше бағалады. Себебі, ол жеңіліс тапқанына қарамастан, сөзінде тұрып ән шырқады.
Белгілі болғандай, бейнежазбадағы жасөспірім — Алмалы орта мектебінің 14 жастағы оқушысы Иса Бекболат. Осы орайда, біз оның әкесі Ілияс Бекболатұлымен тілдескен едік.
Әкесінің айтуынша, Иса бала кезінен музыкаға әуес. Арнайы вокал сабағына қатыспағанымен, мектепішілік концерттерге белсене қатысқан. Анасы сауда саласында еңбек етеді, ал әкесі — Н.Жантөрин атындағы облыстық филармонияның «Нарын» оркестрінде музыкант. Екеуі де — күйші. Әкесінің айтуынша, бес баласының ішінде Иса мен оның қарындасы Зере ғана музыкалық қабілетті мұра еткен.
«Иса кішкентайынан ән мен күйге жақын болды — әуенді тез іліп алып, шын көңілмен орындайтын. Біз ешқашан оны музыкаға күштеп баулыған емеспіз, өзі ынта танытты. Оның талантының ел назарына іліккеніне қуаныштымыз. Дегенмен, біз үшін ең бастысы — оның адамгершілігі мол, еңбекқор болып, өз жолын тауып кетуі» дейді әкесі.
Ілияс Бекболатұлы мен Арайлым Ұзақбайқызы — Құрманғазы ауданына қарасты Сүйіндік ауылының тұрғындары. Қазір Алмалы ауылында тұрады. Иса – бес баланың ортаншысы. Әкесінің айтуынша, Исаға өнер кезінде ән салып, домбыра мен баян тартқан атасынан берілген.
Иса дзюдомен сегіз жасынан бері айналысып келеді және бірқатар спорттық жетістіктерге қол жеткізген. Алдағы уақытта қандай жолды таңдаса да, ата-анасы оны барынша қолдауға дайын.
