Бұл бот құмар ойынның құрсауына түскен жастар мен жасөспірімдерге көмектеспек. Өңірлік коммуникациялар қызметінің мәліметінше, Antioiyn қос бағытта ақпарат береді. Бірінші мәлімет «Мен лудомания жайлы білгім келеді» деген сауалға байланысты келеді. Ал «Маған көмек керек» деген батырманы басқанда ол адамға зерттеу жасалып, диагностикалық тестілеу жүргізіледі. Тест тапсырылғаннан кейін 4 кезең көрсетіледі. Оның алғашқы екеуі көмек сұрақтарына жауап ретінде берілсе, кейінгілері белгілі бір психологтарға сілтеме нұсқайды. Әрі қарайғы жұмыс психологтармен жүргізілмек.
Қазіргі таңда чат-бот аяқталып тұр. Программа алдағы уақытта толықтай мәресіне жетеді.
Жоба Сафи Өтебаев атындағы Мұнай және газ университетінде өткен «Қоғам дерті – лудомания» семинар-тренингінде қорғалды. Іс-шараның мақсаты —студенттермен ашық пікір алмасып, лудоманияның зияны туралы жан-жақты түсінік қалыптастыру. Мамандар құмар ойындардың психологиялық, әлеуметтік және қаржылық салдарлары туралы баяндап, тәуелділіктің негізгі белгілерін атап өтті. Сондай-ақ оның алдын алу жолдары мен одан шығудың тиімді тәсілдерімен де бөлісті.
