2024 жылғы 16 қыркүйекте Германияның Федералдық канцлері Олаф Шольцтің Қазақстанға ресми сапары барысында Қазақ-Неміс ғылым және технологиялар институтын (ҚНИ) құру туралы келісімге қол қойылды.
26 қыркүйекте Шығыс Қазақстан облысында Д.Серікбаев атындағы ШҚТУ базасында Қазақ-Неміс ғылым және технологиялар институты ашылады. Бұл ШҚТУ, Қазақ-Неміс университеті (ҚНУ) және Фрайберг тау-кен академиясы, Бохумның Рур университеті, Штутгарт университеті, Клаусталь технологиялық университеті, Бранденбург техникалық университеті сияқты неміс техникалық университеттерінің бірлескен жобасы.
ҚНИ ғылыми зерттеу бағыттары: геология, сирек және сирек кездесетін элементтер; геологиялық және минералогиялық карта жасау; геомеханика; ұнтақ металлургиясы және қоспалар технологиялары; тау-кен металлургия өнеркәсібінің қалдықтарын қайта өңдеу; ГАҚ технологиялары; материалтану, экология және өмір қауіпсіздігі.
ҚНИ базасында Бранденбург техникалық университетімен серіктестікте «Металлургия» қос дипломдық магистратура бағдарламасы жүзеге асырылуда, сонымен қатар Фрайберг тау-кен академиясы, Бохумның Рур университеті, Штутгарт университеті, Клаусталь технологиялық университеттерімен серіктестікте Geology, Life safety and Environmental protection, Mechanics and Metalworking, Mining Engineering бағыттары бойынша қос дипломды білім беру бағдарламаларын ашу жоспарланды, бұл студенттерге екі елдің жетекші техникалық университеттерінде білім алудың бірегей мүмкіндігін береді.
Осылайша Қазақ-Неміс ғылым және технологиялар институты Қазақстандағы инновациялар мен озық зерттеулерді ілгерілетіп, ғылыми байланыстарды нығайтып, Қазақстан мен Германия арасындағы білім мен озық тәжірибе алмасуға жағдай жасайды.
