Қараған жанның төбе шашын тік тұрғызатын жауыз жігітке желі қолданушылары сене қоймағанға ұқсайды. Ол бұл жағдайдың мастықпен орын алғанын және енді қайталанбауына уәде берді. Айтуынша, бейнежазбаны түсірген тұрғын итті арашалап аман алып қалған. Сол күні оның иті сүйіктісіне шабуыл жасаған көрінеді және ата-анасының жылыжайына қопарып тастаған. Бірақ, осы үшін хайуанды азаптауға бола ма? Міне, жұртшылықты мазалайтын да осы мәселе.
Айта кетейік, әлеуметтік желіде жас жігіттің итті қатал жолмен қорлап жатқан бейнежазбасы пайда болған еді. 31 мамыр күні Еркінқала ауылында орын алған жағдай көпшіліктің ашуы-ызасын туғызды. «Доброе сердце» инстаграм парақшасында жарияланған бұл видео «Ватсапп» қосымшасы арқылы жұртшылыққа кеңінен тарап үлгерді.
Басы жаншылған иттің жанайқайы шығып жатқанда, бейнежаба авторы жануарды жайына жіберуді сұрайды. Бірақ, әлгі жігіт итті қорлауын тоқтатпайды.
Қосымша айта кеткен жөн, қорланған иттің өлгендігі жайлы ақпарат желіде желдей есіп жүр. Облыстық ІІД баспасөз қызметінде мәселенің анық-қанығы сынамалық зерттеулерден кейін белгілі болатыны айтылды.
