Бұл туралы облыстық полиция департаментінің баспасөз қызметі мәлімдеді. Доссор ауылының тұрғыны Талғат Назаров 9 қаңтар күні шамамен сағат 13:30-да Көкарна шағын ауданында орналасқан қыз-күйеуінің үйінен шығып кетіп, қайта оралмаған.
Жақындарының айтуынша, ер адам бұрыннан эпилепсия дертімен ауырады әрі қаланың ішкі аумағын толық білмейді. «Атырау Пресс» сайтының мәліметінше, іздестіру шаралары барысында оның бас киімі мен ұялы телефоны Жайық өзенінің маңынан табылған.
Полицияның мәліметінше, осы дерекке байланысты өзен аумағында іздестіру жұмыстары күшейтілді.
«Із-түзсіз жоғалу дерегіне байланысты жедел іздестіру шаралары жалғасуда. Криминалдық полиция бөлімшелерінің мәліметіне сәйкес, ер адамның соңғы жүрген іздері мен жеке заттары Жайық өзені маңынан анықталды. Осыған байланысты іздестіру жұмыстарына Төтенше жағдайлар департаментінің күштері мен құралдары жұмылдырылды» деді ПД баспасөз хатшысы Мейірім Ердәулет.
Іздестіру жұмыстары жалғасып жатыр. Қандай да бір ақпарат болған жағдайда полицияға хабарлау сұралады.
