Теміржол бойының тәртіп сақшылары стратегиялық аймақтағы қауіпсіздікке алаңдаулы. Себебі темір жолға мал мен жанның шығып кету оқиғалары азаймай тұр. «Профилактика» жылы деп жарияланған 2025 жылы темір жол бойындағы қауіпсіздік шаралары күшейтіледі деп хабарлады Көліктегі полиция департаментінің өкілдері.
Өткен жылы жылжымалы құрамдар 61 рет жедел тежегіш қолданып, оның 19 дерегі адамдардың темір жолды белгіленбеген жерден кесіп өтуі бойынша, ал 42 жағдайда қозғалысқа мал кедергі болған. Адамдармен түсіндіру жұмыстары жүргізіліп, мал иелеріне ескертулер беріліп, қайталанған 7 оқиға бойынша айыппұл салынған.
Айтуынша, жол бойына шыққан иесіз мал уақытша ұстау қорасына кіргізіледі. Малын жол бойына қараусыз жібергендерге 110 мың 760 теңге айыппұл салу қарастырылған. Яғни, айыппұл да өскен.
