Cыбайлас жемқорлыққа қарсы қызметтің Атырау облысы бойынша департаменті барлық қалалар мен аудандарда және шалғай жерлерде салынып жатқан жолдардың сапасына үнемі бақылау жүргізіп отырады.
Атап айтқанда, жемқорлыққа қарсы еріктілердің, мердігерлердің, тапсырыс берушінің және облыстың Cыбайлас жемқорлыққа қарсы қызметі басшылығының қатысуымен Құрманғазы ауданындағы автомобиль жолдарының жөндеу барысына мониторинг жүргізді.
Мәселен, 2018 жылы ұзындығы 26 км «Ганюшкино-Приморье-Утеры-Котяевка» автомобиль жолын күрделі жөндеу басталды. Шарт сомасы-4,2 млрд теңге, мердігер «Бекет Сат Жол» ЖШС, тапсырыс беруші – облыстың жолаушылар көлігі және автомобиль жолдары басқармасы.
Мониторинг барысында құрылыс-монтаждау жұмыстары жүргізілмейтіні, жол жабынының жоғарғы қабаты төселмегені, күрделі жөндеу осы күнге дейін аяқталмағаны анықталды. Мұның себебі мердігерлердің айтуы бойынша құрылыс материалдарының қымбаттауы мен пандемия болды. Осыған байланысты сметалық құжаттамада бұрын көзделмеген жұмыстарды қосып, қосымша келісім жасасу жоспарлануда.
Айта кетейік, 2023 жылы Жол активтері сапасын бақылау орталығының Атырау филиалы тексеру барысында асфальтбетон жамылғысынан ұсақ түйірлі қиыршықтастың бөлінуі түрінде елеулі ақау анықталған болатын. Мердігер бұзушылықтарды бүгінгі күнге дейін қалпына келтірмеді. Ал бүгінгі мониторинг барысында жол жабынының шөгуі анықталды.
Тапсырыс берушіге ескертулер жасалып, кемшіліктерді жоюға уақыт берілді.
Сондай-ақ мониторингпен Ақкөл ауылының кентішілік жолдары мен Атырау-Астрахань республикалық маңызы бар трассасы қамтылды. Еріктілер осы учаскедегі жұмыс белсенділігінің артқанын атап өтті.
