«Жұмысшы мамандықтар қаласы» фестивалінде APEC Petrotechnic Жоғары колледжі Батыс өңірінде алғашқы жаңартылатын энергетика цехының іске қосылғанын мәлімдеді. Оқу-ағарту министрлігінен білгеніміздей, жаңа оқу-өндірістік орталық күн панельдерін өндіруге арналған заманауи құрылғылармен жабдықталған, онда студенттер озық технологияларды және практикалық дағдыларды меңгереді.
Колледж студенттері инновациялық жобаларға қатысудан бөлек ақылы жұмысқа орналасуға мүмкіндік алады. Бұл мүмкіндік олардың кәсіби тәжірибесін нығайтады.
Сонымен қатар, APEC Petrotechnic-те мұнай-газ саласында қолданылатын қондырғылардың шағын нұсқаларымен жабдықталған шеберхана цехы жұмыс істейді. Бұл студенттерге мұнай мен газды бұрғылау, пайдалану және өндіру технологияларын іс жүзінде үйренуге мүмкіндік береді.
APEC Petrotechnic түлектері Теңізшевройл, Schlumberger, ҚазМұнайГаз және т.б. сияқты жетекші мұнай-газ компанияларында табысты мансап құруда. Колледж әр түрлі салалар үшін сұранысқа ие мамандарды даярлауға бағытталған білім беру бағдарламаларын дамытуды жалғастыруда.
