Су ресурстары және ирригация министрлігі 6 облыс әкімдігімен бірлесіп елді мекендерді көктемгі су тасқынынан қорғау мақсатында 56 жобаны іске асырып жатыр. Ақмола, Ақтөбе, Батыс Қазақстан, Павлодар, Солтүстік Қазақстан және Қостанай облыстарында 580 мың тұрғыны бар 84 елді мекеннің қауіпсіздігін қамтамасыз ету жоспарланып отыр.
Жобалар аясында жалпы ұзындығы 310 шақырым бөгет салу қарастырылған. Бүгінгі таңда бұл жұмыстардың шамамен 40%-ы орындалды.
Primeminister.kz мәліметінше, Су ресурстары және ирригация министрлігі су тасқыны кезеңіне дайындық жүргізуде. Бүгінде су қоймаларында қажетті сыйымдылық көлемін дайындау жүргізіліп жатыр. Ведомствоның мәліметі бойынша, Астана су қоймасындағы су көлемі 83%-ға дейін төмендетілді: 2024 жылдың 20 желтоқсанынан 2025 жылдың 3 қаңтарына дейін шамамен 5,1 млн м3 су жіберілді. 2025 жылдың 1 сәуіріне дейін қоймадағы су көлемін 300 млн м3 немесе 73%-ға дейін азайту жоспарланып отыр.
Ақтөбе су қоймасында шамамен 51 млн м3 су бар. 1 сәуірге дейін су көлемін 47,3 млн м3 деңгейіне азайту жоспарланып отыр. Ал Батыс Қазақстан облысы Бітік қоймасындағы су көлемі 34,4 млн м3 дейін төмендетілді. Бүгінгі таңда су қоймасынан секундына 8,3 м3 су жіберіліп жатыр.
Шығыс Қазақстан облысындағы Бұқтырма су қоймасы 79%-ға толы. Министрлік 1 сәуірге дейін қоймадағы су көлемін тағы 8%-ға азайтуға ниетті. Қарағанды облысындағы Ынтымақ су қоймасында 69 млн м3 су бар. Көктемде тасқын су қабылдау үшін су қоймасын 39%-ға дейін босату жоспарланып отыр.
Ұлытау облысындағы Кеңгір су қоймасындағы су көлемі 86%-ға төмендетілді. Көктемге дейін тағы 11%-ға жуық су жіберу жоспарланған. Қостанай облысындағы Жоғарғы Тобыл су қоймасында 585,4 млн м3 су бар. Су қоймасының жұмыс режиміне сәйкес, 1 сәуірге дейін су көлемін 499,37 млн м3 немесе 61%-ға дейін азайту күтілуде.
