Қазақстандықтар зейнетақы жинағын электрондық цифрлық қолтаңбасы арқылы eGov.kz порталына кіре отырып тексере алады. Екіншіден, Бірыңғай жинақтаушы зейнетақы қоры арқылы жеке кабинеттен де білуге болады. Соңғы үшінші жолы – электронды пошта.
Айта кетейік, Еңбек және халықты әлеуметтік қорғау министрлігінің мәліметіне сүйенсек, 2021 жылдан бастап зейнетақы жинағының бір бөлігін жұмсау мүмкіндігіне 721 мың азамат ие болады:
- зейнетақы жинағы бар, қордағы ақшасы "жеткіліктілік шегінен" асатын еңбекке жарамды жастағы азаматтар – 529,7 мың адам;
- Бірыңғай жинақтаушы зейнетақы қорында жинағы бар зейнеткерлер – 178,4 мың адам;
- зейнетақы аннуитетін рәсімдеген және шотында жинағы қалған қазақстандықтар – 13,3 мың адам.
Қордағы қаржының жеткілікті шегі – Бірыңғай жинақтаушы зейнетақы қорында шоты бар салымшыға қажетті ең төменгі сома. Егер шоттағы жинақ сол сомадан асса, қалған ақшаны мақсатты түрде пайдалануға болады.
Жеткіліктілік шегінің негізгі параметрлері:
- әйелдер мен ерлер үшін бірдей;
- кірістілік, инфляция, ең төменгі төлем мөлшері және тағы басқа параметрлерге сүйене отырып, жыл сайын қайта есептеліп отырады;
- 20 жастан бастап әр жас үшін бөлек есептеледі.
