Дүниежүзілік денсаулық сақтау ұйымы қазақстандық ғалымдардың жұмысын тіркеп, өзінің ресми сайтына орналастырып қойды. Бұл сайтта клиникалыққа дейін сынақ жүргізуге рұқсат алған COVID-19-ға қарсы вакциналық үміткерлер тізбесі жарияланған.
Аталған екпені еліміздің БҒМ Білім комитетінің Биологиялық қауіпсіздік мәселелері ғылыми-зерттеу институты қызметкерлері дайындаған. Ол Қазақстан аумағында ауырғандардан табылған вирустың үлгісі негізінде жасалған.
«Бұл – біздің мемлекетіміздің биологиялық қауіпсіздігін қамтамасыз етуге қосқан қазақстандық ғылымның үлкен үлесі. Сондай-ақ, еліміздің мықты ғылыми әлеуетінің белгісі. Осылайша, институт ұжымы қауіпті және аса қауіпті ауруларға қарсы екпенің жаңа түрлерін жасақтауда өзінің маңызды ролін тағы бір мәрте аңғартты», - делінген хабарламада.
Енді институт ғалымдарының алдында клиникалыққа дейінгі және клиникалық сынақтар жүргізу міндеті тұр.
Бұған дейін Қазақстанда коронавиурсқа қарсы вакцина дайындау бағытында зерттеу жұмыстары басталғандығы хабарланған еді. Барлығы төрт вакцина-үміткер анықталғаны атап өтілді.
