Бұл туралы ОКҚ алаңында өткен баспасөз конференциясында ҚР Оқу-ағарту министрлігінің ресми өкілі – баспасөз хатшысы Мереке Нұрмұханова хабарлады. Бұдан басқа, колледждерді интернационалдандыру аясында Жапония, Франция, Қытай, Түркия, Ресей мемлекеттерімен түрлі ынтымақтастық қарым-қатынас орнатылып, бүгінде қазақстандық студенттер мен педагогтер осы елдердің колледждері мен серіктес кәсіпорындарында оқудан және тағылымдамадан өтуде.
Сондай-ақ, елімізде «Жұмысшы мамандықтар жылы» аясында өңірлік ерекшеліктерді ескере отырып, техникалық және кәсіптік білім беруді трансформациялау, колледждерді интернационалдандыру бағытында жүйелі жұмыстар жүргізіліп жатыр.
Бүгінде Қазақстанда 772 техникалық және кәсіптік білім беру ұйымында 565 мың студент білім алуда. Оның ішінде 173 мың түлек биылғы жылы еңбек нарығына дипломмен шығады деп жоспарланып отыр.
2024 жылы маман даярлауға грант көлемі 10 мың орынға артты, биыл 100 пайызға жетеді. Студенттердің шәкіртақысы 2 есеге өсті. Одан бөлек, мемлекеттік тапсырыс шеңберінде білім алатын студенттерді жатақханамен, ыстық тамақпен қамту, жол шығындарын өтеу бойынша әлеуметтік қолдау тұрақты көрсетіліп келеді.
