Қазақстан Республикасының Денсаулық сақтау министрлігінің мәліметінше, қазіргі уақытта Қазақстанда АИТВ инфекциясымен өмір сүретін 36 909 адам бар.
Министрліктің түсіндіруінше, соңғы жылдары елде АИТВ инфекциясының жаңа жағдайларының саны тұрақты деңгейде сақталуда. Атап айтқанда, 2022 жылы — 3 877, 2023 жылы — 3 862, 2024 жылы — 3 811 жаңа жағдай тіркелген. Ал 2025 жылдың 11 айында тағы 3 162 жаңа жағдай анықталған. Бұл деректер, ведомствоның айтуынша, ресми эпидемиологиялық қадағалау жүйесі негізінде қалыптастырылады.
Редакция АИТВ-мен өмір сүретін адамдардың әлеуметтік-демографиялық сипаттамаларын да нақтылады. Министрліктің хабарлауынша, пациенттердің басым бөлігі — ер адамдар: 22 696 ер адам, 14 213 әйел. Ең көп үлесті 15–49 жас аралығындағы адамдар құрайды — барлығы 32 654 адам, оның ішінде 20 638 ер адам және 12 016 әйел. 14 жасқа дейінгі балалар арасында 297 жағдай, ал 50 жастан асқан адамдар арасында 3 958 адам тіркелген, олардың ішінде 2 077 ер адам және 1 881 әйел бар.
Редакция тұрақты медициналық бақылауда тұрған пациенттердің санын да нақтылады. Денсаулық сақтау министрлігінің мәліметінше, АИТВ инфекциясы бойынша динамикалық диспансерлік есепте 34 648 пациент тұр.
Ауруды уақытылы анықтау мәселесіне тоқталған ведомство кеш диагностиканың әлі де өзекті мәселе болып отырғанын атап өтті.
Сонымен қатар профильді ведомство Қазақстанда еммен қамту деңгейінің жоғары екенін атап өтті. Қазіргі таңда АИТВ-мен өмір сүретін адамдардың 92%-ы антиретровирустық терапиямен қамтылған, бұл халықаралық ұсынымдар мен инфекциямен күрестегі мақсатты көрсеткіштерге сәйкес келеді.
Аймақтарда мамандандырылған көмектің қолжетімділігіне қатысты сұраққа жауап берген министрлік елде АИТВ-инфекциясының алдын алу бойынша 20 орталық жұмыс істейтінін хабарлады. Бұл орталықтар диагностика, емдеу және пациенттерді сүйемелдеуді қамтамасыз етеді. Ведомство мәліметінше, орталықтарда кадр тапшылығы жоқ, қызмет толық көлемде көрсетілуде.
Терапияны үзіп алатын немесе ем қабылдауды тоқтататын пациенттерге қатысты министрлік олармен жүйелі сүйемелдеу жұмысы жүргізілетінін түсіндірді.
Ведомствоның айтуынша, жұмыстың маңызды бағыттарының бірі — АИТВ-мен өмір сүретін адамдарға қатысты стигма мен кемсітушілікті азайту. Қазақстан АИТВ/ЖИТС жөніндегі БҰҰ Декларациясы аясында жұмыс істейді және ДДСҰ мен ЮНЭЙДС-тің 2030 жылға дейін эпидемияны тоқтату жөніндегі мақсаттарын қолдайды. Елде заңнамалық деңгейде АИТВ-мен өмір сүретін адамдарды кемсітпеуге, әлеуметтік қорғауға, еңбек, білім беру, тұрғын үй және отбасы салаларында тең құқықтарға, сондай-ақ бала асырап алу мен қосалқы репродуктивтік технологияларға қолжетімділікке кепілдік берілген.
Жастар арасында алдын алу жұмысына қатысты министрлік бұл бағыттағы іс-шаралардың тұрақты түрде жүргізілетінін атап өтті. Ол әлеуметтік желілер мен бұқаралық ақпарат құралдары арқылы ақпараттандыруды, АИТВ профилактикасы тақырыбын білім беру ортасына енгізуді, үкіметтік емес ұйымдармен, жастар денсаулық орталықтарымен және еріктілермен бірлесіп лекциялар, тренингтер, акциялар мен флешмобтар өткізуді қамтиды. Сондай-ақ жастарға оқу орындарында және қоғамдық орындарда экспресс-тестілеуден өту мүмкіндігі ұсынылады.
Министрлік қосымша ретінде Қазақ дерматология және инфекциялық аурулар ғылыми орталығы өңірлік орталықтарға жасөспірімдер мен жастар арасында ақпараттық-түсіндіру жұмысын күшейтуді ұсынғанын атап өтті. Бұл қызмет барысында әлеуметтік желілер мен онлайн платформалар кеңінен қолданылады, сондай-ақ танымал спортшылар, мәдениет және өнер қайраткерлері, қоғам белсенділері тартылады. Ведомствоның мәліметінше, бұл профилактикалық жұмыс 2026 жылы да жалғасын табады.
