Бұл туралы ОКҚ алаңында өткен баспасөз мәслихатында ҚР ӨҚМ Құрылыс және тұрғын үй-коммуналдық шаруашылық істері комитетінің төрағасы Бақытжан Жүнісбеков айтып берді. Ол қала құрылысын реттеу жүйесі ел аумағын ұйымдастырудың бас схемасынан және өңірлерді аумақтық жоспарлау схемаларынан бастап бас жоспарлар мен егжей-тегжейлі жоспарлау жобаларына дейінгі жоспарлау құжаттарының нақты иерархиясында құрылғанын атап өтті.
Аумақты ұйымдастырудың бас схемасы – бұл ел аумағын жоспарлаудың, халықты қоныстандырудың, өндіріс пен инфрақұрылымды дамытудың негізгі құжаты, ол өсу нүктелерін дамытуға және қолда бар ресурстарды тиімді пайдалануға бағытталған. Бас схемада өңірлер дамуының макро көрсеткіштері бар. 3 макроөңір мен 4 агломерацияны дамытудың өңіраралық схемалары әзірленді. Макроөңірлердің өңіраралық схемалары өңіраралық кооперацияны күшейтуге және өңірлердің міндеттерін өзара байланысты шешуге бағытталған. Қазіргі уақытта орталық және батыс макроөңірлердің өңіраралық схемалары бекітілген. Келісу сатысында Алматы, Жамбыл, Қызылорда, Түркістан облыстарын, Жетісу, Алматы және Шымкент облыстарын қамтитын оңтүстік өңір тұр.
Агломерация схемалары қала орталығы мен іргелес перифериялық аумақты өзара байланысты дамытуға бағытталған. Қала құрылысы жобаларын әзірлеу кезінде мемлекеттік қала құрылысы кадастрының деректері пайдаланылады. Мемлекеттік қала құрылысы кадастры бірыңғай құрылыс порталының элементтерінің бірі және аумақты дамытудың негізгі құралы болып табылады, өйткені ол цифрлық бас жоспарларды, егжей-тегжейлі жоспарлау жобаларын, сондай-ақ ғимараттар, құрылыстар, инженерлік желілер туралы деректерді жинақтайды.
«Бірыңғай құрылыс порталының алаңында қолданыстағы барлық ақпараттық жүйені интеграциялау арқылы қала құрылысын жоспарлаудан бастап объектілерді пайдалануға беруге дейінгі барлық процесті толық цифрландыруды қамтамасыз ету жоспарлануда. Бұл бұрын түрлі платформа арқылы ұсынылған цифрлық қызметтер мен деректерге қол жеткізудің әмбебап нүктесі болады», – деді спикер.
