Бұл өзгерістер балалардың тұру жағдайларын қамтамасыз ететін, оларды күтіп-бағу, медициналық көмек көрсету, сондай-ақ білім беру, тәрбиелеу және сауықтыру қызметін жүзеге асыратын объектілерге де қолданылады. Жалпы алғанда, бұл – 15 мыңнан астам білім беру ұйымы. Бұл туралы ҚР Оқу-ағарту министрлігі Балалардың құқықтарын қорғау комитеті төрағасының орынбасары Юлия Овечкина ОКҚ алаңында өткен дөңгелек үстел барысында хабарлады. Негізгі жаңашылдықтардың бірі – жоспардан тыс тексерулер жүргізу кезінде мемлекеттік бақылаудың күтпеген (кенеттен) қағидатын енгізу болып табылады.
Оның айтуынша, жаңа мемлекеттік бақылау жүйесі жоспарлы және жоспардан тыс тексерулерді көздейді. Жоспарлы тексерулер алдыңғы бақылау нәтижелерін, мониторинг деректерін, есептілікті, ақпараттық жүйелерден алынған мәліметтерді, ашық дереккөздерді, сондай-ақ бір жыл ішінде түскен расталған өтініштер санын ескере отырып, тәуекелдерді басқару жүйесі негізінде қалыптастырылады.
Жоспарлы тексерулердің жылдық тізімі автоматты түрде қалыптастырылып, Балалардың құқықтарын қорғау комитетінің интернет-ресурсында орналастырылады.
Жоспардан тыс тексерулер баланың құқықтарының бұзылғаны туралы нақты фактілер болған жағдайда жүргізіледі. Оларды жүргізуге азаматтар мен заңды тұлғалардың өтініштері, прокурордың талаптары, мемлекеттік органдардың өтініштері, бұқаралық ақпарат құралдарындағы жарияланымдар, сондай-ақ қылмыстық қудалау органдарының тапсырмалары негіз бола алады. Бұл ретте анонимді өтініштер жоспардан тыс тексеру жүргізуге негіз болып табылмайды. Балалардың құқықтарының бұзылуына куә болған азаматтар Балалардың құқықтарын қорғау комитетіне e-Otinish порталы арқылы өтініш бере алады. Осы өтініш негізінде жоспардан тыс тексеру басталады.
