Сенат төрағасы орталықтың салынуын әділетті қоғам құру жолындағы маңызды қадам ретінде атап өтті. Оның айтуынша, Мемлекет басшысы Қасым-Жомарт Тоқаев инклюзивті орта қалыптастыру мен мүмкіндігі шектеулі азаматтарға тең мүмкіндік беруге айрықша мән беріп отыр.
«Жаңа Инклюзивті спорт орталығы мүгедектігі бар спортшылардың алаңсыз жаттығу жасауына, халықаралық жарыстарға дайындалуына және жаңа биіктерді бағындыруына жол ашатын орынға айналады», – деді Әшімбаев.
Орталықта бочча, отырып ойнайтын волейбол, арбамен футбол, баскетбол, голбол секілді спорт түрлеріне арналған залдар болады. Бұл нысан параспортшылардың кәсіби дайындығына мүмкіндік бермек.
Әшімбаевтың айтуынша, мұндай орталық тек спорттық нәтижелерге ғана емес, қоғамда бір-бірін қолдауға, бейімделуге, әлеуметтік байланыс орнатуға да жағдай жасайды.
Сондай-ақ Сенат төрағасы жобаны қолдаған Астана әкімдігіне және инклюзивті спортты дамытуға үлес қосып жүрген белсенді азаматтарға алғыс білдірді.
Іс-шараға Астана қаласының әкімі Жеңіс Қасымбек, Туризм және спорт вице-министрі Серік Жарасбаев, параспорт федерацияларының өкілдері және мүдделі тараптар қатысты.
