Өнеркәсіп және құрылыс министрі Қанат Шарлапаев Үкімет отырысында «Таза Қазақстан» республикалық экологиялық акциясы аясында қалалар мен елді мекендердің аумақтарын абаттандырудың үлгілік қағидаларына өзгерістер енгізілгенін хабарлады. Осы құжат шеңберінде негізгі ұғымдар түзетіліп, жаңа терминдер енгізілді, сондай-ақ елді мекендердегі инфрақұрылым объектілерін абаттандыру мен күтіп ұстауды ұйымдастыру жөніндегі іс-шаралар неғұрлым егжей-тегжейлі толықтырылды. Бұл туралы Primeminister.kz жазады. Атап айтқанда, жаяу жүргіншілер, мүгедектер, велосипед көлігі үшін басымдықтар берілді. Үй жануарлары серуендейтін аумақтарды тазарту, био-дәретханалар орнату, жолдарды күтіп ұстау, ғимараттар мен құрылыстардың сыртқы келбеті бойынша қойылатын талаптар айқындалды.
Бұдан басқа, өңірлік саясатты жетілдіру үшін «Қалаларды кешенді салу стандарты» әзірленді. Стандарт сапалы, қолжетімді тұрғын үй және көпсалалы құрылысты енгізу және жайлы қоғамдық кеңістіктерді құру үшін нұсқаулық болып саналады.
Құжат барлық жергілікті атқарушы органдарға қалалық аумақтарды дамыту мен салудың егжей-тегжейлі жоспарлау жобаларын әзірлеуде басшылыққа алу үшін жіберілді.
