Кадрларда әр түрлі дезинфекциялық құралдар көрсетілген, автордың айтуынша олар өте қауіпті. Ресми «Стоп.кз» сайтының мәлімдеуінше, бейнероликтегі ақпарат шындыққа жанаспайды.
Қазақстанда үй-жайларды, ортақ пайдаланылатын орындарды дезинфекциялау үшін және қолға арналған санитайзерлер ретінде қауіпті немесе улы заттар пайдаланылмайды. Бұл туралы санитарлық-эпидемиологиялық бақылау комитетінің өкілдері бірнеше рет мәлім еткен болатын.
– Қазақстанда қолданылатын барлық дезинфекциялау құралдары адамдар үшін қауіпсіз және оларды қолдану жөніндегі нұсқаулықтар бар, онда ерітінділерді дайындау үшін ұсынылатын пропорциялар көрсетілген, – деп хабарлады комитеттің ресми өкілі Ержан Байтанаев.
Видео авторы Ресейде, Үндістанда және басқа елдерде бірнеше адамның өлімі туралы хабарланғаннан кейін антисептиктер аса қауіпті деген қорытынды жасаған болар. Алайда, бұл жағдайлардың барлығында марқұмдар антисептикті мақсатына сай пайдаланбай, оны ішкен. Дезинфекциялық ерітінділерді ішуге болмайды, бұл туралы қаптамаларда жазылуы тиіс.
Дегенмен, кездейсоқ ағзаға аз мөлшерде түскен антисептик қауіпті емес. Мысалы, егер бала 62% этанол бар санитайзерді аузына шашса, бұл өлімге әкелмейді. Бір басқанда құтыдан шамамен 2,5 мл сұйықтық шашырайды. Бұл дозада қандағы алкоголь концентрациясы шамамен 17 мг/дл құрайды. Салмағы 15 кг болатын бала үшін 80-100 мг/дл деңгейі улы болып саналады. Қандағы этанолдың мұндай концентрациясы аузына санитайзерді 4-5 рет шашқаннан кейін болады. Егер мұндай жағдай орын алса, дереу медициналық көмекке жүгіну керек.
Антисептиктерді қаптамада ұсынылған дозаларда қолдану өлімге әкелуі мүмкін емес.
Алайда, терісі құрғақ, тітіркенуге бейім адамдарда және антисептиктің құрамындағы жеке компоненттерге төзбеушілігі бар адамдарда аллергия болуы мүмкін. Бұл жағдайда дәрігерлер дәріханаларда қолжетімді гипоаллергенді немесе балаларға арналған санитайзерлерді қолдануға кеңес береді.
