Кәсіпорындар Қазақстанның азық-түлік қауіпсіздігін қамтамасыз етуге өз үлестерін қосады. 2026 жылға дейін жалпы сомасы 2,6 трлн теңгеге 700 жаңа ауыл шаруашылығы кәсіпорнын ашу жоспарланған, деп хабарлайды Ауыл шаруашылығы министрлігі.
Сүт, құс еті, көкөністерді импорттық алмастыру жөніндегі ірі өнеркәсіптік инвестициялық жобалар АӨК субъектілерін одан әрі кредиттеу үшін облыс әкімдіктеріне жеңілдетілген қайтарымды бюджеттік кредит бөлуді көздейтін СҚО-ның табысты тәжірибесін тарату есебінен іске асырылмақ. Өз кезегінде ауыл шаруашылығы тауарын өндірушілер үшін кредиттер жылдық 2,5%-бен 10 жылға дейінгі мерзімге берілетін болады.
Көкөніс қоймаларын салу және жаңғырту жөніндегі кешенді жоспарды іске асыру жалғасуда. 2025 жылдың соңына дейін қосымша 135 мың тонна сақтау қуаты іске қосылады. Биыл 105 мың тоннаға 26 көкөніс қоймасын ашу жоспарланып отыр. Бұл республиканың көкөністер мен жемістерді сақтау объектілеріне жетіспейтін қажеттілігін жабуға мүмкіндік береді.
Жыл басынан бері тұрақтандыру қорларының жұмысы қайта форматталды. Әлеуметтік маңызы бар азық-түлік тауарларының бағасын тежеудің үш кезеңдік жүйесі енгізілді.
Тұрақтандыру қорлары бойынша жаңа тәсілдердің мәні фермерлерге күзгі және ерте көкөністерді белгіленген бағамен жеткізуге алдын ала төлем беру және маусымаралық кезеңде көкөніс тобының бағасының өсуіне реттеуші әсер ету болып табылады.
Арзандатылған астықты сату бойынша мемлекеттік қолдау тетігі жеке пысықталды, бұл тек ұн өнімдері бойынша ғана емес, сонымен қатар ауыл шаруашылығы жануарларына астық пен жем беру арқылы мал шаруашылығы өнімдері бағасының өсуін ұстап тұруға мүмкіндік береді.
Сондай-ақ жыл соңына дейін астық қолхаттарын кредиттеу үшін квазимемлекеттік сектор субъектілерінің кепілдігімен қатты кепіл санатына қосу жоспарланып отыр. Бұл үшін АШМ Қаржы нарығын реттеу және дамыту жөніндегі агенттікпен және Ұлттық банкпен бірлесіп, астық қолхаттарды кепіл ретінде енгізу критерийлері мәселесін пысықтауда.
Сонымен бірге, биыл «ҚазАгроҚаржы» АҚ ауыл шаруашылығы техникасын, оның ішінде жемшөп дайындау және жылжымалы суару жүйелерін кейіннен фермерлерге лизингке беру үшін сатып алуды қаржыландыруға қосымша 20 млрд теңге алады. Жалпы, үш жыл ішінде бұл мақсатқа 79,4 млрд теңге бюджеттік инвестиция бағыттау көзделген.
Мемлекет басшысының тапсырмасы бойынша ауыл халқының табысын арттыру жөніндегі «Ауыл аманаты» жобасын іске асыру басталды, оның шеңберінде 5 жылға дейін, ал мал шаруашылығы саласында 7 жылға дейін жылдық 2,5%-бен шағын несиелер берілетін болады.
Отбасылық шаруашылықтарды ауыл шаруашылығы жануарларын жем-шөппен қамтамасыз ету үшін өз мүшелеріне өзіндік құны бойынша қызмет көрсететін және оларға азық-түлікті нарықтық бағадан төмен бағамен сататын сервистік ауыл шаруашылығы кооперативтерін көзделіп отыр.
Сондай-ақ, биыл 695,8 мың га жер мемлекет меншігіне қайтарылды. Мемлекет басшысы Қазақстан халқына Жолдауында Үкімет пен әкімдіктерге 2023 жылдың соңына дейін пайдаланылмаған және ауыл шаруашылығы жерлерін бұза отырып берілген жерлерге қатысты нақты шешім қабылдауды тапсырған болатын. ҚР Ауыл шаруашылығы министрлігінің хабарлауынша, тиісті шаралар қабылданғаннан кейін жер пайдаланушылары 2,3 млн алаңда өз учаскелерін игеруге кірісті, оның ішінде 2023 жылы – 270 мың га. Республика бойынша жер пайдаланушыларға қатысты 4,5 млн га алаңда 1907 жоспардан тыс тексеру тіркелді, тексеру нәтижелері бойынша 2,8 млн га алаңда жер заңнамасын бұзушылықтарды жою туралы 1254 нұсқама енгізілді, 201,8 мың га алаң бойынша 136 материал соттарда қаралып жатыр.
