Осыған орай, біз облыстық денсаулық сақтау саласының баспасөз қызметіне хабарласқан едік. Сөйтсек, жақында аудандық орталық ауруханасының қабылдау бөлімшесіне тұрмыстық жарақат алған пациент келіп түскен екен. Ол оң иық пен жамбас аймағында ауырсынуды сезініпті. Травматолог дәрігерлердің тексеруі және клиникалық-аспаптық зерттеулердің нәтижесінде науқасқа «Күрделі жарақат. Аздап сысуы бар сол жақ бұғананың акромиалды ұшының жабық сынуы. Сүйек сынықтарының ығысуымен оң жақ жамбас сүйек мойнының жабық субкапиталды сынуы» деген диагноз қойылды.
Пациентке шұғыл хирургиялық араласу көрсетілді. Аудандық аурухана хирургтары алғаш рет «Оң жамбас буынын толық эндопротездеу» операциясын сәтті жүргізді. Операцияны Атырау облысының бас штаттан тыс травматологы Б.Күлниязов пен травматология бөлімшесінің меңгерушісі Ж.Байзуллин орындады. Бұл операция заманауи медициналық жабдықты және дәрігерлердің жоғары біліктілігін қолдануды талап етті. Бұл аудандық аурухана деңгейінде жасалған алғашқы күрделі операциялардың бірі. Қазіргі уақытта пациенттің жағдайы тұрақты, оны дәрігерлер бақылауда.
