Маңғыстау облысы Полиция департаменті Ұйымдасқан қылмысқа қарсы күрес басқармасының қызметкерлері Есірткі қылмысына қарсы іс-қимыл басқармасының қызметкерлерімен бірлесіп, келіп түскен жедел ақпарат бойынша жедел-іздестіру іс-шаралары барысында 25 қарашада сағат 02:30 шамасында Ақтау қаласы аумағында 11-шағын ауданның көпқабатты үйлерінің бірінде 40 жастағы күдіктіні анықтап, ұстады. Бұл туралы рolisia.kz мәлім етті. Жеке тінту барысында марихуана есірткі затының 12 целлофан пакеті тәркіленді. Одан кейін тұрғылықты жері бойынша тінту жүргізу кезінде полицейлер марихуана есірткі затының 11 үлкен полиэтилен пакетін тапты. Тәркіленген заттардың жалпы салмағы – 41 келі. Сонымен қатар күдіктіден 3,3 млн теңгеге жуық ақшалай қаражат тәркіленді. Күдікті өз әрекетін толықтай мойындады. Бұл дерек Ақтау қаласы ПБ СДТБТ-да ҚР-нің ҚК 296-бабы 4-бөлігі бойынша тіркелді. Сотқа дейінгі тергеу амалдары жүргізілуде. Сот-сараптамалық зерттеу тағайындалды. Күдікті уақытша ұстау изоляторына қамалды. Тергеу мүддесі үшін өзге ақпарат жария етілмейді.
