Бұл мәлімдеменің авторы – Мирна Мантаринг. Хабарламаға сәйкес, ол микробиология, иммунология және молекулалық биологияның диагностикалық және зерттеу зертханаларында 50 жыл жұмыс істеген. Алайда, Желіде бұл деректер расталмайды.
Мирна Мантарингпен алғашқы сұхбат 2024 жылғы 14 тамызда CHD.TV порталында жарияланды. Бұл коммерциялық емес ұйым – АҚШ-тағы вакциналар туралы жалған ақпараттың негізгі көздерінің бірі. Кейін оны Американың басқа да конспирологтары таратады. Видео танымал Substack сюжеттік арнасында шықты.
Америкалық хирург-онколог және Уэйн Университеті Медицина мектебінің хирургия профессоры Дэвид Горски Мирна Мантарингтің кім екенін анықтамақ болды. Мантарингтің вакцина қатерлі ісік ауруын тудырады деген пікіріне қатысты ойын ол Science-Based Medicine веб-сайтында жариялады. Бұл ғылым мен медицина мәселелеріне, сондай-ақ денсаулық сақтау саласындағы дүмшелікті әшкерелеуге арналған мақалалары бар блог.
Горски көпшілікке жария еткен ақпаратқа сәйкес, Мантаринг денсаулық сақтау әкімшісі болып істеген және әскери госпитальдің нефрология бөлімінде ғылыми-зерттеу зертханасын басқарған. Алайда еш жерде медициналық мекеменің атауы көрсетілмейді.
Дэвид Горски өз мақаласында вакцинациядан кейін қатерлі ісік жағдайларының артуы мүмкін еместігін егжей-тегжейлі түсіндіреді. Көп айтылған, мақаламен қазір де танысуларыңызға болады. Онколог сүйенген 2022 жылғы бір ғана қызықты жарияланымға тоқталайық. Атап айтқанда, «АҚШ үкіметінің деректері COVID қарсы вакцинацияға байланысты қатерлі ісік ауруларының 143 233% өскенін растайды».
Горскидің пікірінше, Мантаринг осы мақаланы басшылыққа алған. Ақпарат қастандық теориялары туралы The Exposé веб-сайтында жарияланған. Порталды 2020 жылы британдық дәнекерлеуші Джонатан Аллен-Уокер жасаған. Мақаланың авторы жазылмаған. Қатерлі ісіктің вакцинамен байланысын дәлелдей отырып, аноним вакцинацияның жанама әсерлері туралы VAERS есептерін пайдаланған. Горски жүйені неге ғылыми мақсатта пайдалануға болмайтынын түсіндіреді. VAERS сайтына жай адамдар да жаза алады. Ал олардың көбі өзін нашар сезісе, мұны вакцинациямен байланыстырады, бірақ кейде басқаша болады. Сонымен қатар, жүйе статистикалық деректер қалыптастыруға арналмаған.
ДДҰ-ның қатерлі ісіктерді зерттеу жөніндегі халықаралық агенттігі (IAIR) «жастар арасында қатерлі ісік ауруы жағдайларының өсу тенденциялары COVID таралуына және онымен байланысты вакцинация науқандарына дейін де байқалды» деп мәлімдейді.
Дүниежүзілік денсаулық сақтау ұйымының хабарлауынша, 2022 жылы қатерлі ісік ауруының 20 миллионға жуық жаңа жағдайы тіркелді және 9,7 миллион адам қайтыс болды. Мамандар мұны пандемия жағдайында скринингтік зерттеулердің төмендеуімен байланыстырады. JAMA Oncology ғылыми журналында жарияланған зерттеуде АҚШ-та 9,4 миллион адам сүт безі, қуықасты безі және колоректальды қатерлі ісікке скринингтен өтпегені айтылады. Бұл қызметкерлердің жетіспеушілігімен, коронавирустық инфекцияның таралуына орай енгізілген карантинге байланысты қозғалыстың шектелуімен және басқа себептермен байланысты болды.
Медициналық сарапшылардың пікірінше, COVID-19 қарсы вакциналардың қатерлі ісік ауруын тудыратынына ғылыми дәлел жоқ.
Мирна Мантарингтің COVID-19 қарсы вакциналары АҚШ-та қатерлі ісік ауруының өсуіне әкелді деген мәлімдемесіне ғылыми негіз жоқ. Оның барлық дәлелдері – вакцинацияға қарсы адамдар тарататын расталмаған қауесеттер.
