Бүгін «Саламатты Қазақстан» медициналық-әлеуметтік пойызы жұмысын аяқтайды. «Samruk-Kazyna Trust» қоры «Самұрық-Қазына» компаниялар тобы атынан әлеуметтік жобаларды жүзеге асыратын бірыңғай қайырымдылық операторы. Қор инклюзия, денсаулық сақтау, білім, спорт пен мәдениет сияқты басым бағыттар бойынша еліміздің барлық өңірінде жобаларды жүзеге асырады. Осындай әлеуметтік маңызды жобалардың бірі – «Саламатты Қазақстан» пойызы. «Samruk-Kazyna Trust» әлеуметтік жобаларды дамыту қорының бас директоры Альфия Адиева ОКҚ алаңындағы брифингте жұртшылықты пойыз қызметінің биылғы нәтижелерімен таныстырды. Оның айтуынша, жоба Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссия, «Самұрық-Қазына» қоры, Денсаулық сақтау министрлігі және «Әлеуметтік жобалар қорының» өзара ынтымақтастығы негізінде жүзеге асты.
Былтыр пойызда 35 маман қызмет атқарса, осы жолы 40 маман тартылды. Олар – түрлі бағыттағы дәрігерлер және медиатор мен заңгер. Оның басты мақсаты кем дегенде 100 мың халықты қамту болатын. Биыл бұл міндет толығымен орындалды, тіпті бұл көрсеткіш өткен жылға қарағанда 12 мыңға артық болып, 104 250 ауыл тұрғынына медициналық және құқықтық көмек көрсетілді.
Дәрігерлер 101 мыңнан астам азаматқа тегін медициналық көмек көрсетті. Олардың 54 334-і әйел, 23 685-і ер, 23 282-і бала. Пойыз әр станцияға орташа алғанда 2 күн тоқтап, науқастарды тексерді. Толық жалпы және биохимиялық талдаулар, флюорография, ішкі органдар мен тамырларды ультрадыбыстық зерттеу сияқты түрлі медициналық көмектер көрсетілді. Биыл пойызда медициналық құрал-жабдықтар жаңартылды. Халық ең көп жалпы медицина дәрігері мен терапевтке (77104), невропатолог (16382) пен офтальмолог (15529) сынды мамандарға қаралды. Сонымен қатар, медициналық пойызда 7671 шағын операция жасалды.
Өңірлер бөлінісінде оңтүстік пен батыс өңірлердегі тұрғындарға ең көп медициналық қызметтер ұсынылды.
