Атырауда полиция қызметкерлері пәтер ұрлығымен айналысқан күдіктілерді қолға түсірді. Тергеу барысында 28 жастағы күдіктінің 26 жастағы ер адамның автокөлігін пайдаланып, түнгі уақытта ауылдық округтер мен қаланың әртүрлі аудандарындағы үйлерге терезе арқылы кіргені анықталды. Бұл туралы облыстық ПД мәлім етті. Олар бағалы заттарды, алтын бұйымдарды ұрлап, кейін оларды Ақтөбе қаласына барып, ломбардтарға өткізіп отырған.
Сонымен қатар, күдіктілер бір тұрғын үйдің терезесін бұзып кіріп, жатын бөлмеде тұрған сөмкеден 100 000 теңге мен 40 000 теңге тұратын смартфонды қолды қылған. Басқа бір оқиғада олар үйге кіріп, алтын алқа мен ақшаны қолды етіп, тағы 172 мың теңге шығын келтірген.
Ұсталған күдіктілердің бірі осыған дейін екі рет пәтер ұрлығы үшін сотталғаны белгілі болды. Қазіргі уақытта күдіктілерге қатысты қылмыстық іс қозғалып, тергеу амалдары жүргізілуде.
