Primeminister.kz.мәлім еткендей, Ұлттық экономика вице-министрі Азамат Әмриннің айтуынша, жедел және орта мерзімді сипаттағы 90 іс-шараны жүзеге асыру көзделген. Олар өнім өндіру көлемін арттыруға, тауарларды сақтау және тасымалдау тетіктерін дамытуға, сондай-ақ баға белгілеуді бақылауға, монополияға қарсы және сыртқы сауданы реттеуге бағытталған.
«2023 жылға 30 іс-шараны жүзеге асыру жоспарланған болатын. Оның 25-і орындалса, қалған 5 іс-шара бойынша жұмыс жалғасуда. 2024 жылға 60 іс-шара жоспарланып, оның бесеуі 1 наурызға дейін орындалды. Бұдан бөлек, табиғи монополиялар субъектілерінің реттеліп көрсетілетін қызметтеріне тарифтерден инфляцияға жиынтық салымды сақтау жөніндегі іс-шара тұрақты негізде іске асырылады. 2023 жылы бұл көрсеткіш 1,76 белгіленген шекті деңгеймен 1,08 пайыздық тармақты құрады. Жалпы шаралар кешенін іске асыру тұтыну бағасына қысымды төмендетуге және инфляцияны бәсеңдетуге мүмкіндік берді», — деп хабарлады вице-министр.
Табиғи монополияларды реттеу комитеті 2023-2029 жылдары «Тарифті инвестицияға айырбастау» бағдарламасын іске асыруда, оған сәйкес электр, жылу және сумен жабдықтау, су бұру инженерлік желілерін жаңғырту үшін ауқымды инвестициялар тарту көзделуде. Бұл бағдарлама тарифтердің жыл сайынғы белгілі бір өсуін болжайды. 2024 жылдың қорытындысы бойынша инфляцияға болжамды жиынтық үлес 1,57% деңгейінде болады деп күтілуде.
Ұлттық банктің мәліметінше, бағаларға фискалдық ынталандырумен және тұтынушылық несиелендірудің тұрақты ішкі сұранысы ықпал етеді. Жоғары және тұрақсыз инфляциялық күтулер де өз рөлін атқарады.
«Биыл алдымызда инфляция дәлізіне 6-8% кіру міндеті тұр және оның құрамдас бөліктерінің өсу пайызының әрбір үлесі мультипликативтік әсерге байланысты маңызды рөл атқарады. Инфляция төмендейді, бірақ ол көп факторлы. Инфляцияға қарсы шаралар кешені белгілі бір жобаларға нақтыланған, бұл серпілістерді реттеу және берілген дәлізде инфляцияның біркелкі өсуін қамтамасыз ету үшін барлық жоспарланған іс-шараларды теңгерімді және жедел басқаруға арналған икемді құжат болуы керек. 2022 жылы қабылданған шаралар кешені өз рөлін атқарды, бірақ енді оның құрамдас бөліктерін арттыру кезінде келісілген саясат призмасы арқылы жаңартылуы керек. Инфляцияға қарсы шаралар кешенін іске асыруға қатысатын барлық мемлекеттік органдар Ұлттық банкпен бірлесіп, екі апта ішінде Үкіметте қарау үшін өз ұсыныстарын дайындауы қажет», — деді Серік Жұманғарин.
