– Құрметті отандастар! Сіздерді Конституция күнімен құттықтаймын! Ата заң – мемлекеттілігіміздің мызғымас тірегі әрі еліміздің саяси және қоғамдық құрылысын, айнымас құндылықтары мен даму жолындағы стратегиялық бағыт-бағдарын айқындайтын басты құжатымыз.
Жалпыұлттық референдум арқылы жаңартылған Конституциямыз ұлтты ұйыстырудың нағыз символына айналды. Сондай-ақ негізгі заңымыз елдің саяси жүйесін демократияландыруды, заң үстемдігін қамтамасыз етуді және халықтың әл-ауқатын арттыруды көздейтін ауқымды өзгерістердің берік тұғыры саналады. Конституциялық Соттың құрылуы – осындай институционалды реформаның бірі. Бұл құрылым азаматтардың құқықтары мен бостандықтары қорғалатынына әрдайым кепілдік беретін Ата заңымыздың рөлін мейілінше арттырды.
Жалпыға бірдей жол ашатын Әділетті Қазақстанды құру үшін Конституция қағидалары қатаң сақталып қана қоймай, қоғамның сана-сезіміне біржола орнығуға тиіс. «Адал азамат» деген атқа лайық әрбір адам Ата заңның биік мұраттарын қолдайтынына және оны өмірлік ұстанымына айналдыратынына нық сенімдімін. Баршаңызға зор денсаулық, бақ-береке және толағай табыс тілеймін! – делінген құттықтауда.
Айта кетейік, Қазақстан Республикасының Конституция күні жыл сайын 30 тамызда тойланады. Бұл мерекенің тарихи маңызы зор. Ата заң - еліміздің еркіндігі мен тәуелсіздігінің, тұрақтылықтың символы. 28 жыл бұрын – 1995 жылғы 30 тамызда бүкілхалықтық референдумда Қазақстанның Конституциясы қабылданды. Еліміздің басты құжатында Қазақстан демократиялық, зайырлы, құқықтық және әлеуметтік мемлекет ретінде көрсетілген, оның ең қымбат қазынасы адам және адамның өмірі, құқықтары мен бостандықтары болып саналады.
Былтыр маусым айында Президент Қасым-Жомарт Тоқаевтың бастамасымен өткен бүкілхалықтық референдум арқылы Ата заңға енгізілген өзгерістер мен толықтырулар мемлекеттік модельді кешенді трансформациялаудың негізін қалады. Қабылданған жаңашылдықтар елдегі ауқымды саяси өзгерістердің жалғасы болып, Қазақстанның алдағы жылдарға даму бағыттарын айқындады.
